Shillong, Naiwieng 11
Ka All India Football Federation (AIFF) ha ka sngi Balang ka la pynthikna ba ka nongbah Shillong kan pynlong ïa ka lympung ïaknieh jong ka I-League 3 (Play-off Round) 2026-27, ka ban long naduh 6 haduh 14 tarik u Nohprah mynta u snem ha SSA Stadium bad ha madan MFA, Shillong, katba ka Nongkseh Sport & Social Cultural Club kan long kum ka nongpynïaid ïa kane ka lympung.
Ka jingïoh rung ka Nongkseh sha kane ka wat jingïakhun ka la wan hadien ba ka la lah ban ïalehkai bha ha ka Group-C jong ka I-League 3 ha u bnai ba la lah bad ka la wan ha ka kyrdan ba hakhlieh. Katba ka Godavari FC kaba la don lang ha kane ka group, ka la ïoh rung lang sha katei ka wat jingïakhun hadien ba ka la long ka kynhun kaba kynsai bad wan ha ka kyrdan ba-ar.
Ha katei ka wat jingïakhun jong ka Play-off kin don hynriew tylli ki klob ki ban ïakhun ha ka round-robin kaba tang shi wat kata tang mar san sien ïakhun. Kine ki kynthup ïa ka NEROCA FC (Manipur), BBFS Garh-wal Heroes Football Club (Uttarakhand), Nongkseh Sport & Social Cultural Club (Meghalaya), Clube De Salgaocar (Goa), Goda -vari FC (Andra Pradesh) bad ka Kickstart FC (Karnataka).
Kat kum ka jingpyllait da ka AIFF ïa ki prokram ïalehkai, la ong ba ka jingïalehkai ba nyngkong kan long ha ka 5 tarik u Nohprah ha kaba ka NEROCA FC kan ïakynduh pyrshah ïa ka Goda-vari FC ha ka por 9 baje mynstep, ha kaba yn bud sa ka jingïakhun ka BBFS Garhwal Heroes FC ïa ka Kickstart FC Karnataka ha ka por 2 baje nohphai sngi, katba ka Nongkseh SS&CC kan ïakynduh pyrshah ïa ka Clube De Salgaocar ha ka por 7 baje janmiet.
Ka Nongkseh kan pyn-khreh ruh ïa ka jingïa-lehkai kaba ar ha ka 8 tarik pyrshah ïa ka BBFS Garhwal Heroes FC ha ka por 7 baje janmiet, ka jing -ïakhun kaba lai kan long pyrshah ïa ka Kickstart FC Karnataka ha ka 10 tarik, ha ka por 7 baje janmiet.
Ka jingïalehkai kaba saw jong ka Nongkseh kan long pyrshah ïa ka NEROCA FC ha ka 12 tarik ha ka por 7 baje janmiet bad khatduh eh ïa ka Godavari FC 14 tarik. Ïa ka por ïalehkai jong kane ka jingïakhun ba khatduh yn sa pynthikna da ka AIFF.
